馬圈名人、「加州」系大馬主，綽號「校長」嘅梁挺生上年不幸心臟病逝世，事隔幾個月，由佢一手創辦嘅私校九龍塘聖若望英文書院就出事，八方收到風，話學校前幾日忽然撤換咗服務近30年嘅小學校監兼校長叢桂英，跟手仲炒咗一班教職員，有啲仲係任教20年以上老臣子。
新任校長係梁挺生千金、同樣係大馬主嘅陸梁佳儀。有家長同八方講，今次有人手起刀落，估計可能同叢校長之前堅持唔關閉火石道校舍有關，不排除有人坐正兼將家族生意收番喺自己手，日後辦事都比較方便。
另有家長透露，校方解釋係跟足程序換校長，學校亦冇炒教師，反而有最少六名教職員「無故曠課」，校方仲要搵代課老師上堂。教育局就話啱啱接到學校通知換校長，又例湯例水咁話，已敦促聖若望校董會必須遵從教育局聘用教職員嘅規定，局方會同該校管理層保持密切聯絡。