剛喺舊年年底完成嘅東亞運動會同全運會，本港運動員創下驕人成績，透過配對計劃，一直積極推動本港運動員事業發展嘅恒生（011），今年破紀錄頒發有史以嚟最高嘅獎勵金額，高達718.6萬港銀。恒生副董事長兼行政總裁梁高美懿笑住咁話，今次有少少問題出咗，就係「恒生嚴重超支」。
獎勵港運動員719萬破紀錄
事關由96年起，透過「恒生優秀運動員獎勵計劃」鼓勵運動員，恒生十幾年嚟合共贊助金額都只係1600萬港銀，但單係今屆嘅獎勵金額，已經佔咗接近一半，難怪梁太都話計劃「超支」，不過佢就更加開心話呢次「超支好開心，而且立即審批超支額度」，佢讚揚本港運動員表現出色，超額完成賽事，奪得破紀錄嘅117面獎牌。
未來一班本港運動員仲要挑戰廣州同埋倫敦嘅賽事，梁太話「會繼續加碼，超支都唔緊要o架」，以實際行動鼓勵香港運動員。