一眾馬主參觀昆士蘭議會之後，吃過三文治與曲奇餅，便與貿易專員告別，登上旅遊小巴，向黃金海岸進發，下午入住ConradJupiters&Casino，由馬主N負責打點，五時半又登上小巴參加神奇百萬之雞尾酒會。節目表寫明衣着係smartcasual，馬主N話着T恤就得o架嘞，大家唔信，到達之後，果然好少人穿上西裝上衣，一啲賓客仲腳踏人字拖㖭！黃金海岸適值夏季，居民與遊客大都穿短褲T恤拖鞋，邊度有人好似香港馬主團咁整齊吖，正是一處鄉村一處例，入鄉隨俗，次早大家出席周歲馬拍賣會，衣着果然十分輕鬆。
黃金海岸以海鮮著名，黃昏雞尾酒會供應大量生蠔、大蝦、青口，馬主H怕敏感，睇見別人吃得高興，自己就要克制、克制，忍口忍得辛苦，惟有返到酒店之後，走入賭場，買件曲奇大餅充饑。不過大餅就貴咯，佢一時手痕，落注輪盤，拉吓吃角子老虎，唔夠十分鐘就輸咗幾百銀（港紙啫），好彩仲識得立即鬆人，返上房瞓覺。
晨早去到拍賣場，馬主N帶領之下，先去不同牧場、馬房睇馬，拎住本近一千頁厚嘅拍賣指南，可以請馬房按圖索驥，拉隻第××號馬出嚟行一個圈畀大家睇吓，觀察其體形、結構是否勻稱，站立是否浮躁，身高、走路姿勢等等，原來有啲馬生得特別高大，一啲特別矮小，一啲後腳分叉，一啲行路不暢順，正是睇多幾隻馬，可以增加知識。認為隻馬對辦嘅，就可以搵獸醫檢查，照X光，知道一切冇事，先至可以安心在拍賣會舉手叫價。
拍賣場內有嘉賓席，有公眾看台席，一切有規有矩，但叫價不用舉手，馬主N話舉手就會太揚，係咁意舉吓手指，拍賣助理已經睇到，大大嗌一聲，每口價一萬澳元（叫到咁上下就會調低到五千澳元一口），有一個現象就係，每次香港馬會代表MarkPlayer郁吓手指，就會有其他人爭住叫價，價錢越叫越高，呢啲嘢好易明白嘅啫，香港馬會喎，澳洲人睇到仲唔舉手指托價托價咩，故此馬會係可以買到靚馬，但由每隻二十幾萬澳元起，幾甘o架。