喺舊年11月，因為攞到部份迪士尼人物素材同商標使用權而令股價勁升嘅雅天妮（789），噚日又宣佈攞咗新嘅特許授權，今次嘅授權產品較啱大人，就係永遠嘅球王比利，同埋意大利足球協會嘅全球非獨家特許權，可以用嚟出飾物同擺設，雅天妮今次可謂進軍球壇。
公司公關話，目前只係達成備忘錄，所以未有產品相片，亦未定會出啲乜嘢產品。據雅天妮嘅新聞稿介紹，公司打算出類似耳環、頸鏈同袖口鈕嘅飾物，亦會研究整相架、手錶同擺設之類嘅禮品，即係全方位大包圍。
公司仲話，若果進一步落實協議，兩份協議將會同時生效，比利嗰份協議會喺2015年到期，意大利足協嘅就會今年底屆滿。睇嚟雅天妮可能只係做世界盃呢一轉嘅生意，意大利上屆攞到世界盃，唔通雅天妮睇好佢冧莊？