環球、Sony、華納和EMI四大唱片公司與無綫因版稅問題談判決裂後，四大公司遂與亞視和有線密斟另謀出路。原來，亞視不只設時段播放四大公司旗下歌手MV，且更準備製作一個類似無綫《勁歌金曲》的音樂節目，實行與四大公司聯手跟無綫抗衡。亞視高層鄭偉強昨承認已就音樂節目跟四大公司開會，並斥無綫多年壟斷局面是扼殺了香港的音樂發展。
多年來，無綫以一紙合約綁死歌手，禁止歌手亮相無綫以外的香港電視平台，以致造就無綫一台獨大的壟斷局面，就連張學友，早前也忍不住炮轟無綫音樂節目不足，資源少卻要求多多。不過，隨着近日無綫與環球、Sony、華納和EMI四大唱片公司組成的香港音像聯盟（HKRIA）就版稅問題談判破裂，無綫多年來壟斷局面亦將被打破。
拉攏劉美君倒戈
據悉，近日四大唱片公司除與亞視、有線開會密斟合作，安排旗下歌手MV在兩台播映外，亞視更準備製作一個類似無綫《勁歌金曲》的音樂節目，讓香港歌手多一個推廣音樂的平台。另外，身為環球歌手的劉美君，近日因為HKRIA與無綫反目而被飛出無綫《超級巨聲》主持工作，亞視有意拉攏劉美君倒戈，為《亞洲星光大道2》擔任嘉賓，明剃無綫眼眉。
記者昨日就亞視版《勁歌》一事，致電《亞洲星光大道2》主腦、亞視高級副總裁鄭偉強求證，他直認不諱說：「我係有同四大唱片公司開過會，傾緊製作一個音樂節目，但絕對唔係只播MV嗰種，如果淨係播MV我就唔做啦。」
問節目形式如何，是否跟《勁歌》近似？鄭偉強說：「會搵歌手上嚟傾偈同演出，但唔一定係做直播，由於亞視冇歷史包袱，所以諗法同做法一定同《勁歌》唔同，模式方面可以更大膽創新，主持方面唔一定係自己人，總之會搵電台DJ同一啲對音樂有認識嘅主持。今個星期我會再同四大唱片公司開會，其他細節嘅嘢唔方便透露。」
對於多年來無綫壟斷局面，鄭偉強直斥是扼殺了香港音樂行業發展，他說：「亞視唔係冇搞過音樂節目，早喺10幾年前，亞視同滾石唱片公司都做過《滾石音樂雜誌》，結果滾石俾無綫封殺咗3年。亞視搞唔成音樂節目，最主要係因為冇歌手。」
轟無綫扼殺樂壇
鄭偉強又以台灣作例子，他說：「歐陽菲菲開騷、鳳飛飛復出，都係個個電視台都上，咁先至可以做起個勢，香港個做法真係好奇怪，TVB咁做，唔係幫緊呢個音樂行業，係扼殺緊呢個行業，好似塞車問題咁，政府都會開多幾條隧道嚟疏導交通啦，如果唔係啲車咪塞死喺一條樽頸位？等極都去唔到目的地？」
陳志雲堅持刪片
無綫總經理陳志雲昨日出席公開場合時重申，由於無綫與HKRIA的版稅問題尚未解決，除非港台願意承擔一切法律責任，否則無綫難以足本播放《十大中文金曲頒獎禮》中所有歌手的得獎片段。至於劉美君被飛出《超級巨聲》主持人之列，陳志雲強調與版稅及封殺無關，但拒絕評論事件，又指對劉美君未能主持餘下數集感到可惜。
採訪：林妃
星星有話兒：學友敢言抗封殺
四大唱片公司與無綫就版稅糾紛勢成水火，旗下與無綫仍有約的歌手慘變磨心，憂慮失去谷碟渠道，難怪除「神級」的張學友外，四大公司歌手均未有過激言論得罪無綫。
資料來源：《蘋果》資料室
《轟無綫派》
張學友（冇約）：「（無綫）家畀好少資源，要求就好多，咁都唔公平，家都唔知變咗乜嘢世界。……唔好吓吓自己話晒事，郁啲就封殺邊個。」
陳奕迅（有約）：「我心態係想休息吓養好把聲。身為公司歌手都會配合公司安排。」
《撐無綫派》
陳慧琳（冇約）：「咁（杯葛）梗係唔係好事，TVB觀眾咁多，加埋都唔夠佢多啦。」
李克勤（有約）：「好似婆媳糾紛，作為男人幫阿媽定係老婆？其實兩個都撐，我唯一可以答你，就係暫時唔去其他電視台住囉！」
張敬軒（有約）：「都係為錢，但我同無綫係講心。」
薛凱琪（有約）：「希望早啲平息，最好可以同TVB合作，家感覺好似情侶被迫分手，但公司嘅決定都會支持。」
