政府一手軟一手硬對付示威浪潮大隊伍，硬的那一手，陳巧文做了示範，效果未知。軟的招數，看來不日就會登場，例如：
向八十後招安，畀份好工他們打，讓八十後過一下曾特首「做好呢份工」的癮。不過據學者分析，八十後天不怕地不怕，失業瞓街都唔拘，這樣，未必肯屈就公職。所以最有可能係叫他們做無間道，扮梁朝偉和劉德華同體。
打工唔成，出動墮落骯髒招。引導八十後變成宅男，日夜上網打機，甚至搞埋反政府電子遊戲，讓宅男發洩。問題係，政府有冇能力將網上遊戲設計到《阿凡達》水平？政府邊個部門有A貨占士金馬倫？
八十後威武不能屈，惟有向他們身邊的人事埋手做工夫。三代同堂的，假如父母是自由派，ＯＫ，越級向祖父母施壓，叫便衣上天台擲鏹水彈！震驚？未算，還未出兵嘛。家族裏的姨媽叔伯一律遭警察跟蹤，同事朋友的手機網絡全天候勾線，三日入屋搜查一次，搞到你神憎鬼厭，眾叛親離。不過這樣做隨時連警隊也會掉轉槍頭，向傳媒爆料。鄧竟成眉精眼企，最清楚一件事，邊個係老闆。論資排輩，點都輪唔到鄭耀棠話事。所以這招雖然近乎硬中的「微軟」，恐怕不易執行。這樣，只好最後一擊，請上帝幫拖，每次示威，叫晒宗教界裏面親政府的頭面人物，哈利路亞，人神合體大晒冷，向示威群眾當頭棒喝：凡不相信的，末日就要降臨！