昨日講過儀錶股中國高精密（591），開口中破頂再冇頂可估。高精密的儀錶除咗計家庭用電量，產品亦遍佈油氣管道嘅安全檢測，一有漏油漏氣就會即刻叫救命。內地嚴寒天氣不但令煤供應短缺，天然氣亦供不應求，北京天然氣用量逼近5200萬立方米極限，中國石油（857）話陝京管道已爆棚，冇可能再增加供應。
唔知大家有冇留意，去年12月，國家主席胡錦濤同土庫曼、烏茲別克及哈薩克3國總統，出席中亞天然氣管道開通儀式，象徵着呢條全長1833公里，橫跨烏茲別克、哈薩克直入新疆嘅天然氣管道初步開通，今年整體建成後，每年將向中國輸出400億立方米天然氣。香港當然受惠，因為天然氣入咗中國後，將有管道輸往上海、廣州及近期出現煤荒嘅中西部地區及終點站香港。
業務獨特 現價唔算貴
大力發展天然氣，表面上因為佢係廢氣較少嘅「環保」燃料，實情係要保障國家能源供應安全。2001年中國進口石油只佔整體消費量30%，到08年已是全球最大淨進口國，依存度逼近50%。喺新能源未成氣候時，急需入口大量天然氣去平衡國家能源風險，此外亦要開拓新石油供應，未來3年重點建設包括西北中哈二期、西南中緬等石油管道。當中最緊要係中緬輸油管，來自中東及非洲的石油，將從緬甸直達雲南。
燃氣板塊昨日異動，最搶眼係專做天然氣石油鋼管嘅半新股勝利管道（1080），簡單講佢係中石油同中石化（386）嘅管道分支，因為兩者佔營業額近九成，令佢喺中國市佔率超過22%。招股價2.20元，浮上水面後走勢轉強，招股書預期今年將賺3.3億元人民幣，即係現價計市盈率約20倍，相對市場上嘅燃氣股仲係平，且業務獨特，雖則毛利只有8%唔算高，但總比一眾基建股如中交建（1800）優秀。
現時大股東等持有66%股權，要集齊印花似乎冇乜難度。
胡孟青