高盛上年疏爽派巨額花紅搞到滿城風雨，仲俾股東告佢揮霍公司資產，照計聲譽唔多唔少受影響，點知竟然無損喺MBA學生心目中嘅崇高地位，高盛仍然係學生最嚮往入職嘅投資銀行。
鍾意公司充滿活力
UniversumGroup喺08年底至09年3月訪問六千幾個MBA學生，問佢哋最嚮往邊度返工，結果高盛排第四，只係低過Google，以及兩大顧問公司麥肯錫同Bain。
高盛鍾意派錢係人都知，但學生話佢哋揀高盛首要原因唔係錢，而係鍾意高盛充滿活力嘅文化、喺華爾街隻手遮天嘅影響力，同可以同最優秀人才共事嘅寶貴經驗。
高盛喺海嘯中成績出眾，能夠入到去做嘢，簡直係成功銀行家嘅身份象徵，唔怪得啲學生無視傳媒批評，都要爭住成為高盛一分子啦。