北半球呢排受寒流影響，成個歐洲白濛濛，英國、法國好多比賽都改期；非洲就風和日麗，我求大俠諗住睇非國盃暖一暖個身，點知賽事開打至今，連續3場戰果都古靈精怪，搞到越睇越心寒。
今屆非國盃未開打已出現不幸事件，多哥受槍擊事件影響，最後更被取消參賽資格。而開打至今3場比賽，戰果都爆到七彩；揭幕戰主隊安哥拉領先4球下，最後12分鐘竟然連失4球，俾馬里逼和4:4，爆出300倍波膽。
馬拉維贏波都關香港事
第2天比賽繼續騎呢，周一頭場A組馬拉維對阿爾及利亞，喺可以容納6萬人嘅施達迪拉球場舉行，結果只有約1,000球迷入場；冇入場嘅球迷可能後悔，因為見證唔到馬拉維喺非國盃決賽周嘅首勝。
呢支世界排名99嘅小國，面對世界盃32強分子阿爾及利亞，完全唔似第2次入決賽周，當然阿爾及利亞門將查奧捷都「幫到手」，輸第1同第3球都係佢嚴重犯錯；而幫馬拉維頂入第2球嘅後衞卡科迪加，有睇開本地波嘅球迷可能認得，08年佢踢過流浪，當時譯名魏維思，佢入波唔知提唔提高到本地波嘅聲譽呢？點都好，84年第1次踢決賽周，分組賽以1和2負出局嘅馬拉維，今仗3:0大勝阿爾及利亞，爆出6.5倍W，波膽仲有成100倍。
艾迪巴約唞幾耐都得
到第3場波科特迪瓦對布基納法索，球迷心諗「大象」有杜奧巴、高路托尼、伊保爾呢班英超兵壓陣，唔會又爆啩？世事就係咁邪，「大象」攻足大半場，高尼、杜奧巴多次失機，結果被逼和0:0，再爆5倍D。杜奧巴賽後賴「槍擊事件」，話呢單嘢令隊友不安。
而多哥被取消資格後，B組得3隊爭兩個出線位，科特迪瓦形勢唔算差；但周六要硬拼加納，杜奧巴對車仔隊友艾辛，爭出線都冇情講！至於多哥隊長艾迪巴約就冇你咁好氣，已經返咗祖國；曼城文帥仲話畀佢唞幾耐都得，等佢準備好再上陣先返嚟喎！