啱啱喺債務重組深切治療部推返出嚟嘅俄鋁（486），噚日喺俄國新年後第一個工作日，特登喺香港召開上市記者會，宣佈佢哋今日開始收飛。雖然證監唔畀散戶玩，但佢哋話一啲都冇影響；咁又係，只要能夠上市集資還債，鋁價回升，咁就有翻身之日，到好番晒出得院之時，你慌證監唔畀佢縮番細個買賣股數咩。不過，到時散戶一樣會埋怨證監呢個「父母官」，令佢哋錯失咗搵錢機會。
講番個記者會，可能係俄鋁明知自己仲係債務纏身，想畀債權銀行一個好印象，慳得就慳，竟然淨係喺保薦人瑞信個Office嘅會議室舉行。俄鋁假假哋都係第一家喺香港上市集資嘅俄國公司，吸引好多記者到場，結果係點？咪逼爆會議室囉，唔單止佢哋個行政總裁兼大股東OlegDeripaska只係喺新聞稿內出現，連個記者會唯一一個現身講嘢嘅管理層Volynets，成個記者會中，華華都只係喺前排一直站立嘅人罅望到佢兩三眼咋！