高官跳船潮蔓延，政府噚日宣佈，54歲嘅民政事務局常任秘書長尤曾家麗4月退休。佢本來可以揀做到60歲，但官場中人話，肥尤舊年10月左右已意興闌珊，向同事講好快就走人。
肥尤升咗做D8十年，仕途算順境。佢做民政局嘅兩年半期間，經歷奧運馬術賽同東亞運，都算過關，但嚟緊有個燙手山芋西九文化區，200億投資，文化、藝術同政界嘅人都實，加上政府家勢弱，肥尤做咗咁耐官，深明份工難做，有機會仲唔跳船？
肥尤4月正式退休前休假，之前兩個月會改任職責輕鬆好多嘅政務主任招聘委員會主席，幫政府揀未來管治人才做籌備，包括準備試卷。
接替肥尤嘅係49歲嘅楊立門，佢家掛名係公務員事務局常任秘書長（特別職務）。楊立門本來做發展局常秘，但頂唔住局長林鄭嘅脾氣，主動要求調走，舊年去進修，然後放假，放完假因為暫時冇位，公務員事務局畀個臨時位佢，家肥尤走人，佢亦有地方落腳。