上周五警方喺立法會駐重兵，唔知係咪太緊張，對住一籮菜都嚴陣以待。有反高鐵市民喺facebook撰文，題目係「騎呢年代，青菜，也慘變疑犯？」話當日做義工，同另一義工去公廁幫手洗菜，洗完抬出去即刻被截查。
一男一女警員對住七、八斤菜如臨大敵，問佢哋邊個團體、拎啲菜去邊等等。義工話自己個人身份參加，唔想代大會亂答啲菜用來做乜。警察唔滿意，問：「啲菜唔會係攞嚟掟o架呵？」之後又細細聲自言自語：「用嚟掟就唔會洗啦係嘛…」義工話唔會浪費食物，仲應警察要求帶佢哋去見負責人，煮菜阿姐以阿媽問女嘅語氣問個女警，「想食乜呀？」兩個警察先面懵懵收隊。