高鐵爭議真係一面照妖鏡。保安局前局長葉劉自從23條一役被50萬人踢下台之後，一心洗脫掃把頭形象，仲成功做咗立法會議員。點知江山易改，到咗關鍵時刻，佢嗰副輕藐小市民、自視精英嘅嘴臉好易原形畢露。
葉劉1月6號撰文，開宗明義解釋「我為甚麼撐高鐵？」其中嘅金句話：「正如一位美食家對我說，吃一件鮑魚的價錢等如吃一百個餐蛋公仔麪的價錢，那是否代表大家從此要謝絕鮑魚？」唔少網民大鬧佢淨係識食鮑魚，不知民生疾苦，諷刺葉劉「難道你不知道外面有大饑荒嗎？」有網民反駁話，「鮑魚得一個，只係夠畀一班人入面最惡嗰個食，公仔麪就大家都有得食」。
江山易改本性難移
查實比起佢當年推23條時，質疑的士司機、酒樓侍應、麥當勞服務員會唔會逐條討論23條、話希特拉都係民主制度選出來等名句，今次真係小巫見大巫，不過都能夠反映葉劉本質不變，個底洗極唔清。
葉劉透過發言人解畫，話嗰句說話不過係引述一位美食家嘅意見，並唔係佢個人意見，佢引用嘅目的無非係回應有議員話669億可以用嚟起25萬個公屋單位，但唔等於家要公屋而唔要高鐵，個人覺得兩樣嘢都可以兼顧，唔需要獨沽一味。
保皇黨繼續撐高鐵，反高鐵人士就努力籌備星期五再次包圍立法會。民間學者謝冠東就喺自己facebook度收集市民對高鐵提問，諗住寫份反高鐵FAQ，等其他反對者可以了解各樣反對理據，可以同支持者公開辯論。佢仲同朋友努力整理緊上星期五立法會財務委員會會議嘅transcript，有興趣可到以下網址參考。
http://www.facebook.com/notes/kwuntung-tse/fan-gao-tie-xing-dong-hu-xu-da-jia-bang-mang-qing-guang-chuan/242745508579
mailto:[email protected]