上世紀1935年，美國經濟大衰退之時，ParkerBrothers推出大富翁遊戲，廣受全球歡迎。經營投資者教育課程嘅亞洲投資者協會，其創辦人之一嘅林一鳴忽發奇想，希望中國人亦可創作一個好似大富翁咁家傳戶曉嘅遊戲，經過一年嘅構思同設計，呢套模擬股票買賣嘅「投資樂園」遊戲終於面世。
林一鳴話，呢個遊戲只涉及一家公司嘅股份，每個玩家獲派30股股票同1000蚊現金；遊戲期間會隨機翻開盈虧卡（代表當年公司賺蝕幾多錢）同消息卡（例如環球減息、發生金融海嘯等），玩家可自由掛出不同價格嘅沽盤或買盤，遊戲結束時，手持現金加股票總資產最多者勝出。
資深股民玩得投入
佢話遊戲有300幾人玩過，越識股票嘅人玩得越投入。佢話希望從遊戲中教育大家，買股票唔係買冧巴、買馬，而係買一間公司嘅前景，要睇公司業務表現。