天寒地凍，華中情況更壞，包括湖北等6省市供電緊張，單係湖北，每日平均缺電5000萬度。武漢市要限量供電，霓虹燈、景觀燈都要關上，工廠局部停工，市面「黑麻麻」一片。
由於地理問題，華中地區供電主要靠電煤及水力，比例為6比4，可是氣溫急降，水電變冰電，電煤供應即時告急，現時庫存唔夠8日用。想向山西產煤大省買，但人哋自己都唔夠用，內蒙、新疆又太遠，華中冇核電廠，嚟緊又到春運，用電需求勢必急增。
有見及此，中央早前喺新一個十一五規劃中，提出智能電網發展大計，包埋水、電甚至熱力等，以智能網絡接連，簡單講係跨省嘅高壓電網，希望到2020年將新能源供應提升至佔整體15%，預計要用成4萬億元人民幣。
電網建設又點只中國大搞，大摩估計09年全球喺呢方面開支約200億美元，到2030年更超過1000億美元，好似唔記得咗中國嘅建設。不過點都好，大摩估計所產生嘅商機起碼有20萬億美元，電力、電錶、新能源同電力設備都會受惠。
高精密貨源歸晒邊
現時喺香港要捕捉呢個投資機會可選電錶股，有威勝集團（3393）及中國高精密（591），資金似有換馬迹象。先講點解先進電錶會有大需求，有別於傳統單向顯示用量嘅電錶，智能電網可以將每戶嘅用電量準確傳送到電力公司，等電力公司快速調撥各省市嘅輸電量，減少電能損耗。現時美國嘅老電網，部份電能損失高達67%，實在非常驚人。
中國今年會先更新全國超過100萬個變電站，智能電錶需求3000至5000萬個。除咗中、美兩地，國際能源總署預計，到2030年歐洲投入提升電網嘅資金達5000億歐元，預期10年後可覆蓋全球八成人口，搭配智能電網嘅智能電錶安裝將超過7億個。
兩隻儀錶股比較，高精密經歷洗倉震走散戶後，重上4元招股價以上，蟹貨冇晒，加上71.25%股份喺大股東同基金手，貨源歸晒邊，贏面好過派晒出街，仍喺收集當中嘅威勝。
胡孟青