結婚係人生大事，照計應該高高興興同大家分享先係，不過中大校長劉遵義似乎鍾意低調啲。
劉校長前日同未婚妻麥嘉軒出席兩大校長盃足球賽時，仲介紹麥嘉軒係港大校董，問佢結婚大日子搞成點，又話未確定，點知原來佢當晚就同麥小姐簽咗字，正式娶咗呢位已故天王巨星張國榮嘅外甥女做劉太。唔認結婚嘅除咗劉華之外，今次又多個劉氏宗親。
晚宴清淡為主
據中大友講，劉校長前日出席完兩大校長盃足球賽之後，跟手就神神秘秘咁閃返去校長官邸漢園，原來兩家親人同埋婚姻監禮人都已經喺度等緊對新人，雙方簽字同切蛋糕就宣佈禮成，排場一啲都唔鋪張，連晚上嗰兩圍晚宴都係以清淡為主。
聽講劉校長本來都諗過請幾個朋友，不過後尾為咗保持低調都係作罷，連特首都係噚日先知道呢件喜事，連隨打電話去祝賀一對新人。