銅鑼灣大業主希慎興業（014）主席利定昌，舊年10月突然逝世，經過三個月，希慎噚日終於公佈最新管理層安排，曾任希慎董事總經理嘅利定昌堂細佬利子厚重返希慎，只做非執行董事，即日生效；而署理主席嘅鍾逸傑就坐正，正式成為獨立非執行主席，年薪20萬。
今年48歲嘅利子厚，原本喺希慎做咗17年董事，07年突然辭去董事總經理一職，離開公司，家係滙圖投資管理董事總經理，仲係港交所（388）同埋馬會嘅董事；當時市場傳佢同利定昌唔啱KEY，所以辭職，而希慎一直話公開招聘新董事總經理，但就一直冇乜下文。
利家成員只做非執董
利定昌忽然去世，市場已經估利子厚作為家族成員，會重返希慎，但奇怪嘅係，今次佢只擔任非執董。
希慎今次同時委任光大國際（257）執董兼總經理范仁鶴，同埋恒生（011）前副行政總裁潘仲賢做獨立非執董。喺新安排下，希慎全部13名董事，只有兩位執董，分別係管財政嘅嚴磊輝同公司秘書容韻儀，而利家成員都係非執董，同一般家族控股公司唔一樣，會唔會再變，真係要遲吓先知。
李華華