香港班搵食車司機一向追捧Hiace，唔單止因為佢襟揸，仲出名襟改。不過好多車主改嚟改去不外乎加吓包圍、頭唇，玩電鍍又或者整套靚音響咁。都係今日呢個車主夠驚喜，唔單止將架Hiace變身「餓o靚之Van」（OrangeVan），仲連擺貨嘅尾廂都出人意表，竟然DIY鋪晒木地板，令成架車當堂貴氣晒。
記者：趙慧敏
攝影：陳陶鈞
Model：Cherry@PureModals
日本人氣玩法
唔好以為肯花咁多心機去改，呢架一定係新款嘅Hiace，咁你就錯，架車係Hiace100系，係1997年出廠嘅舊款，足足有成十幾年車齡，難得車主仲落足心機咁去改，而且心思十足，名副其實殘車升呢萬人迷。
車主本身專營日本汽車產品，對日本最新車界潮物當然瞭如指掌，在車廂鋪設木地台便是近年日本車主大熱玩意。「日本人好鬼錫車，佢哋簡直將部車當做屋企咁，鋪晒木地台之後，乘客上到車都除鞋，費事你踩花佢個地板。」不過車主話，自己架Hiace係搵食車，用實木地板嘅話，真係有啲嘥料，於是就將實木地板改為較平價嘅無縫膠地板。睇起嚟有木地板咁上下靚仔，但就更輕身，再者有任何刮花撞凹，換過一塊就搞掂。最緊要仲係價錢平好多，成個尾廂地台，材料費唔使一千蚊，黐完之後仲剩番些少料，作為日後更換之用。為咗方便擺貨及睇落更靚仔，車主更將後輪凸起位置以一個木箱遮蓋，咁風格就夠晒統一。
轉吓色後生晒
橫掂落手落腳整，當然唔止改個尾廂咁簡單，搞搞車身自然唔少得。原來車主改車前，都睇咗好多關於改Hiace嘅資料，最後先確定以懷舊味十足嘅「餓o靚之Van」嘅橙色為主要色調，貪佢夠搶眼，又有中古味。要變身「餓o靚之Van」，車身上半截噴上奶白色，下半截則是橙色，車頭指定經典「大眼仔」頭燈，個金屬側鏡就專登喺日本訂返嚟，至於原本放喺車頭嘅指揮燈就改咗喺車兩側，效果出奇咁好。
始終係舊車一架，內櫳梗有啲殘舊，扮靚方法係同門板及儀錶板轉色，同車身色彩相呼應，一身暖色成架車當堂醒目晒，再換埋個黑皮座，貴氣唔少。最緊要係人人睇落都估唔到原本係乜車。車主載住我喺九龍塘兜咗一轉，沿途就惹來唔少司機好奇目光，泊車後，仲有人走埋嚟問係乜嘢牌子嘅車。玩改車，不外乎想咁，吸引到好奇目光及讚美，滿足感都返晒嚟。車主仲話遲啲仲有計劃將個車櫳再執執，搞到成間辦公室咁，到時架車就更過癮。
簡易DIY
扮木地台
你都想幫自己部車鋪上型仔「木」地台？其實又平又簡單，DIY話咁易。
1.由於尾廂地台可能有凹凸，可先用夾板墊底。
2.量度地台面積，預算地板嘅使用量。
3.在一般裝修材料店可買到無縫膠地板，約$400盒，大約可鋪設30-40呎，今日示範嘅Hiace用了一盒多。
4.將無縫膠地板由車尾向車頭打直鋪，以無縫地板專用膠水黏貼，膠水同樣可在裝修材料店購買。
5.後輪位置可以同樣貼上膠地板嘅木箱遮蓋。
鳴謝：日本仁（23575806）