澳洲海關對入境行李的檢查甚為嚴苛，為的不是反恐，而是嚴禁外來農產品、動物產品、中藥入口，驚住呢啲物品帶入細菌、病毒。但澳洲又歡迎遊客攜帶澳洲水果出境喎，例如昆士蘭芒果就好出名，價錢便宜，亞洲人最鍾意買。澳洲海關查勻所有入境人士，包括澳洲公民嘅行李，出動警犬，又要打開行李包逐件睇，故此遊客入境要大排長龍。
入咗境就輕鬆咯，神奇百萬拍賣會派小巴嚟接機，司機立即送馬主團去昆士蘭省議會大樓，貿易專員StephenBredhauer在門口迎接。馬主H第一次到布里斯班，早上十一時，只見街上行人極少，到了高樓大廈區（應是商業區），也不見有甚麼人氣，車輛也不多見。司機唔熟路，兜了大圈先搵到議會（parliament）入口。入到去，貿易專員率領四位職員（其中兩個係來自中國大陸女士）歡迎馬主，專員以前亦係議員，現在負責中國與越南貿易事務。
省議會有兩座建築物，高座係現代建築，低座兩層係一八六九年落成嘅，係古蹟文物，正門入口處望上去二樓，有一幅玻璃窗彩畫，畫中女士就係維多利亞女王，漂亮異常，係女王當年送畀昆士蘭議會嘅禮物。二樓有三個大廳，「上議院」（senate）與「下議院」遙遙相對，根據英國傳統，上議院鋪紅色地氈，但昆士蘭已經廢除咗「上議院」，故「紅室」已經停用，每年只係內省督（Governor）主持一兩次儀式之用，室內有一紅座椅，亦係維多利亞女王送嘅，聽講現時只准兩位大人物坐，就係當今女王以及澳洲總督。中間一大房係圖書室，只准議員入內，四壁書架藏書全是百幾年來議會議員發言紀錄（hansard），啲議員未必有興趣讀紀錄嘅啫，咪坐入去睇報紙與閒話幾句囉。最大嗰個廳就係「綠室」嘞，所有座椅都係綠色嘅，如英國下議院，議長坐中間，政府官員坐佢右手面，反對黨影子內閣人員坐左面，大家面對面，相距廿餘呎，議員分坐兩旁。貿易專員請馬主團坐在議長位影相，扮吓樣先，馬主C問：「呢度有冇人擲蕉o架？」專員大笑：「我曾在電視睇過台灣議員打交，但未見過擲蕉，昆士蘭香蕉好好食o架！」