舊年股神畢菲特（圖）爆響口，話喺A股公司大楊創世做咗幾套西裝，大楊股價即刻升到成支穿雲箭咁，前日內地又傳另一A股公司宗申動力嘅董事長左宗申會喺25號飛去美國朝聖，搵畢菲特摸杯底傾兩句咁話，講到似層層，終於搞到宗申上星期五升停板。
華華翻查資料，發覺原來宗申嚟緊會開發新能源電動電單車，咁就真係開正股神嗰瓣啦！
唔通股神真係諗住好似入股比亞迪（1211）咁，照辦煮腕擸埋宗申，嚟個雙翼齊飛？
蓋茨基金曾投資宗申
而前日，宗申董事會秘書黃培國就出嚟證實面聖確有此事，但就話會面只屬於集團層面嘅事，唔關上市公司事；華華仲八到，蓋茨基金去年投資過宗申，係人都知蓋茨同股神老友鬼鬼，話唔埋今次會面係由蓋茨穿針引線。睇嚟股神概念仲有排玩。