中大校長劉遵義同未婚妻麥嘉軒上星期交咗擬結婚通知書，準備拉埋天窗。噚日中大同港大舉行第七屆兩大校長盃足球賽，劉校長好大方帶埋麥嘉軒落場睇波，但致辭時仲好含蓄，介紹未婚妻時只係話係港大校董會成員。八方問佢哋好日子搞成點，劉校長話未確定，仲話定咗之後會通知八方，旁邊嘅麥嘉軒淨係笑笑口，話乜都交晒俾校長答喎。
兩個人十足孖公仔一齊睇波，踢到下半場臨完場，中大突然入波，扳平一比一和局完場，呢對孖公仔一齊開心到彈起。仲以為麥嘉軒真係以港大身份出席，佢咁替中大開心，即係話俾大家知：佢嘅真正身份係準中大校長夫人至真。