領隊入錯貨唔緊要，最緊要識得糾正錯誤，就好似曼聯領隊費格遜咁，佢確認貝碧托夫喺奧脫福經已冇前途，諗住喺季尾將佢同其他冇用球員齊齊掃走，籌旗8,000萬鎊（約9.9億港元）簽新球員；若然有球會喺今個月睇中貝碧托夫，睇怕老費亦唔介意提早送佢出門口。
仲以為買咗「簡東拿」
老費家陣眼尾都唔會望貝碧托夫，但查實喺18個月前，佢花咗好多時間、精神同金錢，先買到貝碧托夫返嚟。早喺08年1月老費就想簽貝碧托夫，可惜熱刺唔肯放人。到咗夏天，老費再次出手，將個收購價由1,800萬鎊一路加到3,075萬鎊（約3.8億港元）先至成事。聽曼聯隊內啲人話，老費對貝碧托夫情有獨鍾，全因呢位保加利亞國腳前鋒，好有曼聯大帝簡東拿嘅影子。
但佢加盟至今發揮一般，加上不時受傷（最新可能要做內窺鏡膝部手術），喺66場比賽入咗20球，每場平均入0.3球，以一個身價3,000萬鎊嘅前鋒嚟講，咁嘅成績肯定唔及格。
據知情人士表示：「冇人會質疑貝碧托夫嘅技術，但弊在佢冇鬥志同埋效率低，一句講晒就係死蛇爛鱔。派佢落場比賽好似推佢去行刑咁。」
尼曼查維迪扭計失寵
除咗貝碧托夫，聽聞老費對拿尼、蘇蘭托錫同埋路爾斯安達臣嘅表現都好唔滿意；至於尼曼查維迪雖則係球隊嘅骨幹球員，不過衰在成日扭計，所以亦告失寵。老費對上一次大清洗係喺95年，當時佢踢走曉士、恩斯同埋簡察斯基等，畀位碧咸、史高斯、畢特同埋尼維利兄弟上，仲非常成功。
老費俾貝碧托夫搞到冇晒癮，好彩請事假照顧中風太太嘅雲達沙可望於日內由荷蘭返英，加上里奧費迪南嘅背傷亦無大礙可於本月尾復出，算係有啲好消息冲喜吓！