俄鋁上市，雷聲都算大，不過入場費仲大，一般散戶以往抽新股，為求獲配較多股份，不惜借孖展認購多啲，但要計數隻股首日掛牌升幾多先有錢賺。呢次俄鋁招股，即使有證券行肯推孖展認購，但散戶都係無謂自尋煩惱。
其實，大價新股幾「蝦」散戶玩，犯本之餘，股數又唔買得多。在港上市的德國企業星亮控股（955），平情而論唔係冇賣點，以37元招股算係大銀碼，惟每手股數只係80股，散戶參與都唔會有太大壓力，但都係小注為妙。
星亮係德國的二百年老店，製造多類專業塗料，在歐洲享負盛名，其產品用途極廣，遍及日常生活各層面；集團營業額約42%來自德國市場，中國市場則佔24%。
公司管理層早前曾透露，亞太市場角色漸見吃重，故無意返德國上市，暫未知會否在內地發行A股。星亮上周五跌2.5%，收34.85元，低於招股價。該股業務可在亞洲區佔一重要席位，但股份要大炒，似乎仲要畀啲耐性。
方星俠