內地40年來罕見的降雪量，至今已令60萬人受災，居民取暖用嘅煤炭電力及天然氣需求大增，希望寒冬早日過去。
天氣陰晴不定，中央政策出手最勁，即使當地雪花紛飛，國家的黃三角發展規劃繼續利好股份升溫，特別係相關嘅42家A股公司最明顯受益。所謂黃三角，簡單講就是黃河入海口渤海南部沿岸地區，主要為山東省區內包括濰坊、煙台等19個縣市，範圍涉及該省六分一人口，近1000萬人。
工業重點是生態、環保節能、能源開發，食品有鹽業及海產副食品加工，按十一五規劃，單係山東省首期投資金額高達1.5萬億元人民幣。近期走勢較似樣的概念股，係來自濰坊市的濰柴動力（2338），佢係當地第一家來港上市嘅老牌H股，經常會聽到股評人話佢生產柴油發動機，即係汽車引擎。用得柴油，當然唔會係名廠車嘅引擎，亦唔算得上高科技，但無論貨車仔、大貨車甚至船隻都用佢。由於柴油雖平但煙大，香港私家車好少用，現時有歐洲車代理開始在港引入TDI引擎環保柴油轎車，算係新能源車以外較理想選擇。
貨源歸邊蟹貨少
濰柴旗下仲有濰柴重機公司，專門生產柴油發電機，可作常用或應急電源，全國船舶用市場佔有率達80%，並出口至越南、印尼及菲律賓等地。除炒作黃三角概念，汽車甚至農業振興都關佢事，因為佢旗下湘火炬汽車主要生產重型貨車，濰柴亦有農業用引擎，勝在業務多元化。最近連第一拖拉機（038）都行，點少得濰柴。
公司去年頭9個月業績不俗，純利升18.1%至超過23億元人民幣，毛利率維持19.3%，已明顯改善，淨現金高達42億元，唔怪得基金持重倉，包括摩通、瑞銀等加起來已超過26%。論價碼濰柴跟電動車絕對有得揮，濰柴去年底收62.70元，眨吓眼就創新高見過78蚊，無他，單係第三季盈利已翻兩番，佔首三季盈利達48%，即使股價見80蚊，市盈率都係20倍，價碼越大越爆升嘅股份，配合估值要再升唔難，主因散戶持貨少，樓上無蟹貨。
胡孟青