05年港姐特別受富豪歡迎？繼冠軍葉翠翠和亞軍陸詩韻後，季軍林莉近期被發現忽然富貴，住比華利山坐百萬名車，被指搭上內地富豪。林莉昨日自揭富豪是她新簽模特兒公司VIP老闆W君，又辯稱未婚老闆只是欣賞她似林志玲，她閒時會自由出入老闆豪宅，但指暫時不想接受富豪照顧。
名模呂燕、王敏德馬詩慧夫婦、姚予晴、戴小奕等，昨日在沙田馬場為周大福賽馬日示範珠寶。被指搭上內地富豪的05年港姐季軍林莉，近月轉型做模特兒，忽然富貴住大埔比華利山、出入坐200萬瑪莎拉蒂跑車，又狂掃10多萬名牌，與之前打1萬元月薪銀行工的生活，大有不同。
出入比華利山
林莉前日在TVB避談傳聞，更閃匿入化妝間。她前晚和昨日分別出席《仁濟》及馬場活動，開腔澄清，但就越講越亂，她指內地富豪只是模特兒公司老闆W君，她說：「係美麗嘅誤會，嗰個係我老闆。」搭上老闆？她說：「我唔係拍拖，我簽新model公司三四個月，老闆喺內地做生意。」
對於被影到入住比華利山，林莉說：「我冇住比華利山，嗰度好貴，唔方便，唔係我嘅，係老闆嘅。佢唔喺香港，我間唔中上去，放低自己啲嘢。」同老闆很熟稔？她說：「見過幾次，都有人問我佢結咗婚未，我都唔知，冇見過佢有太太或者女友，只係知佢欣賞我，唔係鍾意嗰種，佢話我似Chiling（林志玲），話會放啲資源喺我身上。」
談被包口窒窒
老闆是否向她追求？林莉即說：「未。」隨即改口說：「冇冇冇。」問她是否接受有富豪照顧，她竟說：「暫時唔想，雖然我唔係想做港版Chiling，但搵富豪同結婚都唔諗住，如果真係有（富豪照顧），就唔會見到我出嚟做嘢啦。」
此外，馬詩慧對近日鏹水狂徒再次肆虐，表示擔心仔女安全，她說：「佢哋都有出旺角行街，我都擔心，叫咗佢哋行啲有瓦遮頭嘅地方，不過呢啲嘢係防不勝防。」她更斥責狂徒以傷人為樂，應該反省，她說：「啲人越來越無聊，掟都掟喺啲空曠地方，玩都唔可以玩鏹水，唔應該咁樣傷害其他人。」
採訪：LawWaiMan、StephenieYeung
攝影：LawWaiMan、Edwardchou
