南華足主羅傑承前日就爆出球隊家極力斟介效力英超富咸嘅南韓國腳薛琦鉉（圖），羅生噚日睇完球隊以2:0擊退晨曦，殺入銀牌決賽後，心情大靚咁話喺睇波途中，喺電話收到個e-mail，話薛琦鉉嘅個人意願都想過嚟，「好接近」成事，但係仲有啲條件未傾得掂，希望最遲今個禮拜三有定案。薛琦鉉家喺英超約3萬鎊周薪（約37.2萬港元），咁咪成過百萬港元月薪？事成的話肯定係全港最高身價球員。雖然羅生話唔使咁貴，但佢之後又話侯城嘅前鋒法根都係想簽嘅目標球員之一，富咸亦繼續幫佢哋搵球員。但咁搞法南華班費分分鐘唔止3,000萬喎。