雨潤食品（1068）董事大換血！上個禮拜五公司就發咗通告，宣佈孫燕軍同康洹因要專注其他業務，已經遞信辭去非執行董事同獨立非執行董事職務，並即時委任其他人接棒，仲新增咗3位董事，合共有5位新血上場，佔現時董事局11位董事近半。
雨潤晉升咗加入公司14年嘅俞章禮做執行董事，年薪有8萬美金（約62.4萬港銀），佢仲會收取酌情花紅，家陣佢持有雨潤15萬股認股權，以上個禮拜每股收22.05港銀計，約值330萬港銀。
雨潤同時委任王開田同李程驊做非執董，喬均身兼獨立非執董同薪酬委員會主席，陳建國亦兼獨立非執董同提名委員會主席，4位董事年薪同為10萬人仔。
呢次雨潤董事局大換血，睇嚟都有一輪適應期，公司股價上個禮拜五就唔爭氣，跌咗1.6%。