港交所（388）行政總裁周文耀今個星期五lastday，華華聽聞，7個業界組織將會分兩場，分別喺本周二及周四跟周文耀舉行餞別晚宴，足見周總嘅江湖地位。
7證券組織輪流farewell
證券學會、證券及期貨業職工會、網上經紀協會、專業財經分析及評論家協會等5個組織，會先喺聽晚同周總餞別，然後輪到證券業協會與重組後新成立嘅香港中資證券業協會，跟周總farewell。
證券業協會主席李耀榮對周文耀有讚無彈，指周總在位期間，港交所與業界相處得十分和諧，經常同業界保持良好溝通；周文耀又特別注重交易系統嘅穩定性同升級，令到本港交易系統比日本、歐美嘅更加穩陣，冇乜死機事故。唯一要彈嘅，可能係最近先推動到無紙化嘅諮詢工作。
今年63歲嘅周文耀，應該係在位最長嘅港交所行政總裁，佢早於91至97年擔任聯交所行政總裁，再喺03年由滙豐投資管理重返港交所，擔任行政總裁至今，兩個任期加埋有12年，如果周文耀以後寫書講述本港證券業及交易所發展歷史及前景，一定大把捧場客。
李華華