鄧麗欣（Stephy）和傅穎雖然一直鬧不和，不過卻同病相憐，繼Stephy被彈中英文差勁之後，日前傅穎在blog上晒港式英文時同樣被彈水皮。前晚Stephy寸傅穎要加強進修，有需要時要查中英文字典，以免教壞小朋友。
鄧麗欣和傅穎一向面和心不和，但兩人卻有共同嗜好，就是寫blog出書。之前Stephy因出書有過百錯字，接受外國傳媒訪問時文法又錯漏百出，結果被彈中英文差勁，怎料傅穎日前在blog上以英文留言時，同樣文法出錯，被取笑晒港式英文。
前晚Stephy到將軍澳電視廣播城演出《慈善星輝仁濟夜》，被問到傅穎被彈英文水皮一事，Stephy說：「我冇睇過報道，不過有時寫blog都係好隨意。我唔想批評人，自己又唔係好好，錯咗咪改，我自己都係學習中，如果係有需要就去進修學多啲嘢，始終藝人嘅blog比較多人留意，作為其他人嘅榜樣要小心啲。我自己寫blog會睇多幾次，有需要就查吓中、英文字典，避免出錯教壞小朋友。」
傅穎又出寫真
另外，傅穎早前到台灣接受《FHM》雜誌訪問，她穿上低胸裙騷美腿，她坦言若工作有需要，絕不介意性感，但三點不露，稍後她會再出寫真集，但不再sell東洋風。
至於前晚有份演出仁濟騷的容祖兒，穿上貼身舞衣唱新歌《桃色冒險》，與舞蹈員有辣身舞，更有高難度擘腿動作，難怪她坦言有點尷尬。問她會否覺得因無綫和四大唱片公司因版稅問題僵持互相封殺，間接增加自己在無綫出鏡的機會？祖兒說：「我嘅機會一直冇少過，總之時間夾到我一定做。」問祖兒可知道陳奕迅會否出席《勁歌金曲》總選？她說：「唔知喎，或者佢心情好照嚟，到時有分曉。」
採訪：楊潔雯 攝影：仇志德