早幾日天寒地凍兼落雨濕濕，厭悶天氣真係令人冇乜mood，噚日終於天色放晴，人都精神啲，上星期去到元朗「奶茶王」大發餐廳過門不入嘅特首煲呔亦不再閃縮，再出動搵食。
雖然高鐵撥款生死未卜，但煲呔心情似乎未受影響，噚日朝早10點鐘左右，就抵達位於洪水橋嘅大發。上次煲呔book定枱，一大一細兩枱預計有8個人幫襯，噚日冇訂枱，只係同埋老婆、保鑣一行三人現身。
戴住帽冇乜人認出
現場消息稱，煲呔兩公婆十分低調，坐低都幾乎冇人認得出特首紆尊降貴嚟幫襯。一個姓譚街坊同八方講，10點鐘好多人嘆奶茶食早餐，大發幾乎座無虛席，兩公婆見有個卡位就坐低，佢話煲呔戴住頂cap帽，着深藍色外套、冷背心同白T恤，冇打煲呔；而特首夫人嘅打扮就更加平民，譚生話如果曾太唔係同煲呔同行，仲以為佢只係普通街坊。
大發馳名奶茶王、豬扒包，煲呔坐低冇左揀右揀，亦冇好似高鐵假諮詢，一如推出政改方案，一錘定音就叫咗呢兩樣鎮店之寶。一星期前大廚佳哥諗定整碟加料「苦瓜揚州炒飯」同撚手「風沙九肚魚」畀煲呔品嚐，可惜煲呔noshow，噚日食早餐唔使咁豐富，簡單啲好正常。
據講煲呔表現匆忙，食咗幾啖就埋單，只係逗留10分鐘左右，兩杯奶茶連兩個包，冇加一唔使貼士，盛惠58蚊。老闆娘彭太同八方講，特首夫婦終於嚟幫襯，真係好歡喜，衰在太忙都唔得閒特別招呼貴賓，「同佢講聲早晨囉！我哋對個個客都係咁！」
「奶茶王」噚日例假
彭太對自己出品十分有信心，所以唔使問煲呔有乜意見，好唔好味。但煲呔上星期唔幫襯真係走寶，事關「奶茶王」賴旺明噚日例假，由另一位師傅頂更，換言之煲呔飲嗰杯並唔係得獎嘅極品「奶茶王」，不過彭太強調大發奶茶王質素如一，邊個冲都一樣好味道，如果煲呔想試真啲，當然歡迎佢翻啅啦。
mailto:[email protected]