香港公安搵個大學女生祭旗，手法卑劣，戰友得悉陳巧文被捕，即時透過SMS、facebook動員大家聲援，有十幾廿人去差館外抗議，包括長毛。
元旦遊行後長毛同陳巧文一度口角，陳巧文唔滿意社民連在場指指點點點，大叫唔好抽水出風頭，引發一場風波，長毛對此應冇芥蒂，否則噚日唔會到場，更幫手拉橫額，抗議香港公安秋後算賬，但可能唔想又俾人誤會，長毛噚日唔接受採訪或發表意見，以示純粹聲援，唔係博曝光。
陳巧文曾到日本探望被拒返回上海的維權人士馮正虎，馮正虎上網知道陳巧文出事，都有越洋慰問，陳巧文話如果有人贊助機票，願再去探正虎。