【本報訊】於08年北京奧運香港火炬接力期間展示雪山獅子旗，開展了陳巧文社運之路，卻令雙親遭警方勾線滋擾，陳父直言憂心這名獨生女兒的安危，更早料到她遲早會被警方拘捕，「我哋小市民要動政府一條毛都好難，但係政府想郁你幾咁容易！」
於上周四反高鐵團體包圍立法會前夕，被警方重案組探員造訪寓所的陳父，曾多次向記者表達憂心，怕傳媒報道事件會惹怒政府，向女兒報復。「我50幾歲退咗休，爸爸媽媽今年都80幾歲，我哋成個家庭都好擔心……佢成日收恐嚇信，又經常咁樣上街，好難擔保。」退休公務員的陳父更道盡為人父母的矛盾心情，「我哋支持佢嘅理念，但唔會支持太過激嘅行為，咁你做就即管去做，但係如果令到自己受傷害，呢個我哋就唔支持。」
「警察有計劃吼佢o架」
陳父披露警方曾多次聯絡過陳巧文，「都嚇佢唔到，佢好鬼硬頸。」陳父早料到警方遲早會拘捕女兒，阻嚇80後示威者，「我都知道警察係有計劃吼佢o架嘞，好似我屋企電話都有俾人勾線，但係我又冇乜嘢講，唔覺得佢哋可以做得啲咩出樣。」
陳巧文16歲於英國中學畢業後，由於父親退休，無力再供她在當地升學而返港，她先後在浸會大學及城市大學修讀副學士，因成績優異獲香港大學哲學系取錄，08年以一等榮譽畢業後，目前正在港大哲學系讀碩士。
陳巧文自08年展示雪山獅子旗一舉成名後，便不斷參與反高鐵、爭取雙普選等社運活動。她又曾成功發起簽名運動，將被指為隱形左派的原港大學生會會長陳一諤罷免，趕落台。