呢期小妹最hit，因為我年年24歲，永遠係80後嘛！不過，時間停頓，留住青春冇所謂，但噚日放假行街時，隻手錶無啦啦停鬼咗，搞到之後約朋友食晚飯時遲晒大到。啲friend都話，好多時要到隻錶停咗先知電池冇電，如果因為咁遲到重要約會，就麻煩喇。
九龍表行董事總經理黃錦成話，其實大部份擁有時、分、秒針嘅三針石英錶，都有「冇電顯示」嘅基本功能，只係大家平時冇留意啫。他懶係神秘咁話，當電池就快冇電時，秒針就會由正常每秒一格，會一秒跳咗兩格，「即係提示你電池冇電，要更換喇。」部份錶款例如Hamilton秒針每行5秒會震一震，都係冇電提示。
唔用最好拆電池
佢又話，有啲買咗貴錶又唔捨得戴，都會長期放埋一邊，但耐咗隻錶就會冇晒電。佢話應該先拉起錶嘅錶冠，即係凸起嗰粒調校時間嗰粒掣，咁隻錶就會停止唔用電。不過，佢話最好應該將電池拆出嚟，因為電池放耐咗，電漿會漏出嚟，而錶嘅機件最怕就係潮濕，所以好易整壞隻錶。他又建議用水銀電池，唔好用平啲嘅碳電池，因為水銀電池冇咁易漏電漿。
他話一般情況下，錶嘅電池使用期約兩年，但會隨手錶機件老化而縮短，而手錶最好一兩年攞番原廠或專業師傅檢查吓，包括睇吓防水錶內嘅防水圈有冇老化等。
電郵：mailto:[email protected]