高鐵撥款要以拉布戰與政府抗衡，爭普選則要打鐵趁熱，據了解公民黨、社民連已確定「公投備忘錄」條文，社民連副主席陶君行透露，主席黃毓民已經於前日大筆一揮，在備忘錄上畫押，隨即將文本送公民黨主席關信基；兩黨主席簽名後，聽日兩黨會公佈五區總辭、變相公投詳情。
本月27日宣佈辭職
兩黨五個議員本月27日宣佈辭職，而磋商備忘錄最後階段，係討論公投結果與投票意向掛鈎問題。由於香港冇所謂公投法，因此兩黨共識以兩個條件界定公投成敗：一是投票率必須逾五成；二是以泛民候選人總票數計，而不是以贏取議席數目定輸贏。
有份撰寫備忘錄人士稱，以上述兩大條件定輸贏，背後牽涉到兩黨對政改方案投票意向，如果贏咗，就反對政府個方案，若然輸了，則不排除投贊成票；有此安排，係要確立公投憲政意義，市民投票意向真係會左右政改方案通過機會，打真軍唔係做戲咁做。