白手興家嘅地產界傳奇人物、中原老闆施永青年逾60，決定退下來，先淡出香港業務，但留任集團主席，為公司發展策略提意見及集中處理國內業務，最快兩年後先全身而退。施老闆08年2月首次宣佈退休，但因金融海嘯而復出主持大局，今次「半」退休，交棒畀副主席兼行政總裁黎明楷，一般估計唔會有大震盪。
據知中原日內會宣佈重組內地業務，相信施老闆屆時會講吓自己角色同「任務」。金融海嘯後樓市極速反彈，據估計中原去年盈利高達12億元，生意前景光明，施老闆應該放心退下來。施老闆已將名下中原地產、中原（中國）和中原集團全部股份捐畀「施永青慈善基金」，相信退休後可以全身投入做善事。