郭晉安、關詠荷、米雪、郭政鴻呢班資深演員又有劇推出，就係輕鬆民初劇《五味人生》，噚日大家齊集沙田宣傳，話明五味，所以大會安排咗一啲試味遊戲，等班藝員嚐盡甜、酸、苦、辣、鹹，從而考驗吓大家演技。
關詠荷好耐都冇劇集出街，呢套劇極有可能係關詠荷告別作，佢話：「小朋友正式入學，我嘅生活改變晒，要重新做人去適應個女，開始覺得個女性格好似我，睇到自己細個嘅影子，嚟緊又會準備小朋友返學發展，所以暫時都唔會參與幕前演出。」
郭政鴻片酬保密
影帝張家輝個女真係精靈，成日都想爸爸攞獎，關詠荷話：「家個女唔見爸爸就會問係咪去咗攞獎，仲會得閒摸吓個獎盃。」至於吳鎮宇早前被指傷人搞到上差館，之後吳妻仲俾人話本身脾氣唔好，關詠荷話：「我同佢太太平時都有見面，冇乜嘢，但件事對兩方面嚟講都係無妄之災，如果要上庭大家都係輸家。」
無綫拍戲俾人話刻薄，將藝員薪價一減再減，甚至有啲係友情價。郭政鴻都有參與《72家租客》，有指佢人工兩萬減到兩千，鴻仔話：「我只可以講我封利是唔止兩千，比起正常價唔係少好多，我只係出一出鏡啫，可以接受。」郭晉安建議分紅制呢個方法，但講完安仔都知冇可能啦，無綫又點會咁蝕底。