周潤發和導演杜琪峯這對好朋友昨日在尖沙嘴出席記者會，發哥表示睇好陳法拉闖影壇，他謂不介意與因藏毒被判感化的o靚模周凱盈合作，並笑言可與近來紅爆的周秀娜組成「電影3周」。
周潤發與杜琪峯昨日到尖沙嘴文化中心出席「第五屆鮮浪潮短片競賽」記者會，發哥在台上鼓勵年輕參賽者，他說：「演員係木頭同埋玉石，要有好嘅工匠雕琢，演員好幸福，有導演去構思同塑造新嘅形象，所以我唔會退休。希望有機會可以同你哋合作，話唔定你哋是但一個，20、30年之後變成占士金馬倫（JamesCameron），但係食得鹹魚抵得渴，希望大家慢慢學。」
讚甄子丹刀槍不入
之後發哥接受在場記者訪問，談笑風生，他先提到今年打算休息，又表示希望拍攝輕鬆片種，他說：「甄子丹咁犀利，打嘅就搵佢啦，佢係超級英雄，刀槍不入（指《葉問》劇情），俾槍打都唔屎（死）得。我家想談情說愛，同隻秋田犬啦。」記者追問想與哪位女星談情，他笑說：「我鍾意嗰啲都休息喇喎，紅姑（鍾楚紅）啦，一係搵佢代替周太做阿四，紅姑煮嘢好叻。」
問發哥可有留意影壇生力軍，他說：「陳法拉啦！」莫非他看過法拉在劇集《有營煮婦》的露bra演出？記者提到周秀娜也打算進軍影壇，發哥即笑說：「咁咪電影雙周？搵個啱嘅劇本都得o架，加埋啱啱判刑個女學生（指周凱盈）就電影三周喇。」
盼與王菲合作拍戲
發哥又笑言放假會在家中追看劇集《美麗高解像》，他說：「幾好睇，有警世作用，拍得幾過癮。」但被問到可有遇過劇情中的事件時，他笑說：「冇，佢哋做出嚟啫。」
另外，發哥主演的《孔子之決戰春秋》，由久休的王菲唱主題曲，發哥說：「非常好，其實我上次出席嫣然個活動見佢唔到，佢復出梗係好啦，有機會都想同佢合作，因為我覺得佢係一個有趣嘅人。」
採訪：藍文浩、陶然婷
攝影：黃偉雄
