由於泛民全面玩杯葛，調查甘乃威求愛不遂事件委員會差啲唔夠議員參加而流產，不過建制派冇咁容易放生甘威，堅持搵出真相，噚日更公然霸王硬上弓，威迫冇興趣介入調查呢單感情瓜葛（簡稱調情）嘅議員去「調情」。
黃宜弘提名加入
自由黨方剛早就表明冇興趣「調情」，最終卻被黃宜弘擺上枱，提名佢加入「調情」委員會，前黨友梁君彥更送佢一程，和議提名；另一位前黨友梁劉柔芬見方剛扁晒嘴，細路仔咁同佢講：「算數啦！」最終方剛極無奈地說：「我接受。」表情同心情，十足俾飛仔呃咗嘅純情少女。
方剛事後表明完全無意去「調情」，佢個「屈」樣有目共睹，又話自己最近腳痛兼公務繁忙，根本冇時間開會「調情」，呢次真正俾人擺上枱。唔識講「唔好」嘅方剛話，一定會記住黃宜弘今次好帶挈，日後有機會一定還番畀佢。