上月盟主
英國大風雪，除咗好似外電所講，令好多無所事事嘅英國人登入「徵友」網站尋求新刺激，最大影響莫過於大量球賽改期，上個禮拜我貼場查爾頓就係咁。見過鬼怕黑，我今次放棄英國波戰線轉戰南歐嘅葡超，而睇好波圖禮拜日對利亞拿開「主勝」，全因球員有火，隊波都有火。
侯克爭表現踢世盃
遇到不快就訴諸暴力，呢種社會病態通處都係，好似酒後打人、因感情問題打女人、因偷食俾老婆打，或者輸波搵人出氣嘅新聞最近大家聽唔少。波圖前鋒侯克被指喺上月輸俾賓菲加後，喺球員通道同人打交，暫時未收到風佢會被罰停賽，即係話聽晚場波應該踢得。
事件被揭發後，侯克即時曹格上身，佢表示後悔之餘決定寄情工作，家陣首要目標係爭取代表巴西踢世界盃，至於會唔會加盟曼聯，就係後話喎。佢肯將一身怒火用番喺球賽上，以佢嘅質素，聯同法卡奧同埋據講傷癒嘅法利亞斯等人，波圖嘅入球數字應該節節上升。波圖喺葡超屈居於賓菲加同埋奇兵布拉加之後排第3，長期受壓，呢啖氣點吞？歇冬前嗰場聯賽輸俾賓菲加，滿肚火過年，而周中場葡聯盃並未精銳盡出，用咗好幾個U19球員踢，即係班主力球員儲晒火，肯定當利亞拿係沙包。
利亞拿遇強即屈
利亞拿排得前6，唔係善男信女，但既然早前作客吞布拉加雙蛋，今次作客有火嘅波圖唔慌有運行。再講，隊波今季都主場輸埋俾賓菲加，似乎遇強越弱。其他心水首選意甲烏甸尼斯主場贏拉素，烏軍有首席射手迪拿達利坐完波監猛虎出柙，平/半盤讓得起。兩隊屢合演入球騷，吼埋「大」膽更適合。至於直播嘅費倫天拿亦食硬巴里，熱W穩。
藍鑽石
近5場往績：/LWLW