【本報訊】紅紅藍藍的帳篷如花開遍名廈林立的中環，香港的商業中心昨天舉辦嘉年華；已經快要在這個城巿消失的舊日巿集、已經快要被「高速發展」所唾棄的社區經濟，在中環短暫復活一天。50後、60後、70後、80後，無分年齡先後，人人神態從容，展現對未來的盼望，對政府霸權拆村不再視而不顧，對不公義的小圈子選舉不再沉默。抗爭，要快樂，抗爭，要堅持到最後。黃昏下班的OL走過，感慨說：「咁樣嘅香港先似番啲樣。」
記者：雷子樂、張嘉雯、張文傑、謝明明
熱鬧的議事堂外，氣溫低見14℃，溫熱的「不遷不拆鹹湯丸」、清香的「暖入心大地能量番薯糖水」、飽肚的「功能組別一舊飯」，連繫每個抗爭的巿民。有人全身髹上綠油，有人穿上鮮色太空衣，地上放着菜園模型、欄杆貼滿「沒有資格代表香港人」的功能組別議員照片。婦女們、年輕人個個埋頭苦幹，示威者萬眾一心，成就香港首個抗爭嘉年華。
下午4時，財委會會議開始，場外的嘉年華正式展開，已解散的indie樂隊「永遠懷念塔可夫斯基」揭開序幕，你打鼓，我唱歌，現場氣氛極為高漲，猶如台灣選舉的造勢晚會。抗爭者不時大喊「鄭汝樺大話精！」、「狗賊狗官！」、「歪理！」。
CP鄧竟成被嘲似PC
生產本地有機肥皂的Bella昨於嘉年華擺檔，她不認同高鐵背後主張的經濟發展模式，「生活唔係只求快速，應慢慢享受，好似用肥皂慢慢冲凉咁，路亦可以慢慢行。」她上次亦有參與反高鐵苦行，今次希望以另一方式表達意見。
險遭政府逼遷的灣仔藍屋居民四妹亦現身嘉年華，在藍屋居民關注小組攤檔協力賣炒米粉及番薯糖水，年約70歲的她去年曾到過菜園村，力讚那裏環境好，「菜園村同藍屋一樣值得保留，我撐菜園村居民！」關注組成員阿姿希望，成功爭取藍屋「留屋留人」的經驗，可以鼓勵菜園村居民繼續堅持不遷不拆，深信兩者一脈相承。
60歲的前警員黃先生昨日現身反高鐵，認為80後一點也不「激」，「我1968年當差，比起左仔放波蘿、流血，80後邊度激？根本好溫和，元旦嗰次鄧竟成派咁多人喺中聯辦，好多餘，根本高層太過緊張、冇信心，做CP（CommissonerofPolice，警務處長）家好似做咗PC（PoliceConstable，警員）咁。鄭耀棠話要出兵，係想害死人。高鐵點解唔可以起喺錦上路？慳番300億。」
陳雲：親歷社運提升智慧
文化評論人陳雲認為立法會繼續「拉布」，繼續「拖延」是好事，可以令更多人明白高鐵工程的問題，「香港政府有咁高質素嘅反對者，應該開心先至係，我發現親身去呢啲場合，討論社運問題，會有助提升智慧。」
立會外的聲音
肢體撐菜園村
唐偉津 20歲 演藝學院學生
「我全身髹上綠色嘅乳膠漆，代表菜園村同埋環保上身，油漆有凹凸嘅質感，代表香港係綠色沙漠，不斷剝落同埋侵蝕風乾，起高鐵我唔反對，但係可唔可以唔係好似家咁起法？我贊成總站起喺錦上路，點解政府唔肯聽好嘅方案？可能有人支持呢？我今日會跳舞同埋用肢體語言嚟表達對環保嘅關注。」
係激情唔係激
趙小姐 19歲 浸大新聞系副學士
「我17歲生日嘅時候，係天星碼頭最後一夜，我一個人由中環坐船送別碼頭，心諗香港咁發展落去，郁啲就話拆走晒所有嘢，第日到我60歲，我仲有乜嘢童年回憶？我哋90後年輕人只係激情，唔係激。我係喺天星之後首次質疑香港嘅發展，之後再冇參與社會運動，直到上年六四（20周年）先第一次上街，今日（昨日）就再嚟反高鐵。」
難忍霸道政府
黃同學 20歲 IVE學生
「今日嚟係要反對政府嘅白癡高鐵方案，高鐵對菜園村、大角嘴，咁多人有影響，點解政府當佢哋冇到？人民要站出來，抗議政府、議會不公。我覺得成件事主流媒體傾向政府，巿民根本冇空間知道高鐵問題。12.18包圍立會嗰次我都有出席，政府當巿民無知，乜都唔肯講，非常霸道。大角嘴嗰度，係10月有報紙登政府先開諮詢會，擺明就係隱瞞，年輕人唔會再忍受呢個政府。」
不容矮化運動
李雨夢 90後 中學生
「我上年六四後第一次參加社運。起高鐵用咁多錢，政府夾硬上馬。我爸爸係60後，話支持起高鐵，話我冇遠見，但一講到要669億都話貴。高鐵影響好多人，政府一意孤行，呢場運動唔係80後主導，好多代嘅人都有同感，外界咁樣講係矮化咗成個運動。我上年7月去咗菜園村導賞團，之後千人怒撐菜園村我都有去，我啲同學覺得我無聊，出嚟都冇用啦，但係個政府咁霸道，我唔出嚟唔得。」
表明50後態度
黎則奮 60歲 前社運人士
「我覺得登報支持政府嗰班自稱50後民主派係抽水！我當年搞學運，社會派來來去去得嗰幾十個人，賣廣告嗰啲肯定唔係社會派。高鐵本身有好多問題，有啲人問我，咁樣出嚟反對其實有冇希望，我覺得乜嘢事都係做咗先知有冇希望，唔係睇到個效果就唔肯出嚟。」