童年時每次走到雪糕車前，目光除了凝聚在雪糕叔叔唧出的香滑雪糕，亦會不期然向車廂探索，想找出做香滑雪糕的神秘方法。長大後明白了雪糕是預早製作，但雪糕車內裏乾坤依然充滿神秘。今日借車版記者身份，終於有機會「登堂入室」，為大家解開這多年謎團。
記者：趙慧敏
攝影：梁細權
Model:Ruby
熄匙無得食
一上車，第一時間當然要睇睇嗰部多年嚟，一次又一次令我甜在心頭嘅雪糕機啦！而佢亦係全個內櫳最搶眼嘅設備。雪糕機接駁引擎，所以引擎一關，雪糕機便停止運作！大家難道沒印象，買雪糕時，總附送隆隆引擎聲，便是這原因。至於擺放車尾嘅大型雪櫃，則接駁車尾嘅壓縮機，令雪櫃保持冷凍。其他設施，可說一眼望晒，就得個洗手盆！當然，搵食車不能期望有豪華裝備。咦，車頂掛住把小風扇，唔通部車無冷氣？無錯，因為雪糕機由引擎供電，若再加上冷氣便負荷過重，所以惟有辛苦雪糕叔叔了。原來在夏天，我哋食雪糕凉浸浸，雪糕叔叔卻要頂住酷熱賣雪糕。
100匹瀟灑過彎
要碰上雪糕車，總要有點緣份，不過其實現時全港富豪雪糕車有十六部，在鬧市又或者郊遊熱點命中率較高。十六輛雪糕車出廠年份由93年至04年不等，由於一般十三至十五年就要換車，所以現時購入嘅雪糕車只是貨車車陣，在香港才再加工。「車斗全部係纖維料，十分耐用，我哋會將報廢嘅雪糕車車斗拆下，翻新後重新安裝在新車上。」富豪雪糕負責人祈煜明說。多年來雪糕車車身一直保持用紅白藍三色，近年才陸續出現有車身廣告嘅雪糕車。不過車身顏色雖然改變，但車種基本上沒有太大變化，由七十年代首輛由英國入口嘅富豪雪糕車至今，都是沿用FordTransit客貨車，不過就由無風油軚發展至今日嘅歐盟四型、仲有埋Turbo柴油環保引擎。唔好以為佢有成三噸重，仲要孭埋大雪櫃就唔跑得，拍攝當日就睇住佢輕鬆爬大斜上山頂，而且逢彎過彎，十分瀟灑。
藍色多瑙河=滑嘟嘟雪糕
富豪雪糕由1970年開始經營至今，已經近四十年，首部雪糕車在荃灣大河道球場擺賣，當年每杯雪糕是五毫子，高峯期日賣過千杯雪糕。四十年來每日營業，都會播放「藍色多瑙河」音樂，令所有香港人聽到這音樂響起，便知雪糕車就在附近，帶給大家不少童年回憶。
雪糕車真身
車種：Transit300S（歐盟四型）
引擎：2,402ccDOHC直四渦輪增壓
馬力：100ps/3,500rpm
扭力：285Nm/1,600rpm
傳動：五前速手波
售價：約$215,000
查詢：福特香港（25031032）
另一經典……
雪糕電單車
要講屬於集體回憶嘅雪糕車，仲有雪糕電單車！家全港食環署「冰凍甜點」流動小販只有二十多檔，當中極少係用電單車嚟做生意，所以雪糕電單車可謂碩果僅存。
雪糕電單車其實大都係意大利經典品牌Vespa（偉士），車齡閒閒哋二三十年，不過偉士出名鋼水靚，性能好，所以「一把年紀」仲拖住大冰櫃，都行得郁。喺城門水塘擺檔嘅初伯，「拍檔」就係1984年出廠嘅偉士經典之作PX200E，四速手動波箱，12匹馬力，最高時速110km/hr，當年新車價已經要3,000蚊。睇真原來仲要用腳撻車，而且因為負荷唔細，不時會搶軚。「就算你揸電單車幾叻，唔係揸慣佢都幾難揸。」初伯說。二十多年風吹雨打，在PX200E身上留下不少痕迹，曾經斷裂嘅後鏡由初伯自行維修，車漆亦經多次補油，不過，「到家我仲係日日揸住佢上山落山，都唔知幾有力。」
