小藍經常透過手機上網睇片，但電訊商越嚟越多負面新聞，好似濫收上網費，發放搶錢短訊，小藍呢排都好小心睇手機費月結單，咁就發現咗激氣嘢。小藍用開數碼通，仲係PriorityPlus客戶。12個月通話費等總支出超過$3,600，可以做PriorityPlus客戶，打電話去熱線可優先處理，生日仲送Cova蛋糕或紅酒㖭。
小藍昨日發覺被取消會籍，熱線職員話因小藍手機費，09年夾埋唔夠$3,600。小藍計算發現已經用咗超過$3,700喎。再搵數碼通晦氣，主管解釋話總消費額要扣除賬單內嘅「回贈」金額，得番$3100，佢仲強調「呢個係公司政策。」回贈都扣？筆錢係我買手機時預繳，數碼通先逐期畀番我o架，係我嘅錢嚟，咪即係搶錢？
突然又話達標再生效
小藍據理力爭搵到總部，對方又講另一版本，話大家溝通有誤會，回贈金唔會扣除。佢話終止小藍嘅會籍，係因為公司上年12月review小藍個account，總費由08年12月至09年11月計算，已經計埋回贈金額都唔夠$3,600先終止會籍。佢補充話，PriorityPlus係每月都review過去12個月累計總金額，今個月再review，小藍全年用咗$3,700又達標，新會籍2月生效，為期一年。真係羅生門，呢個故事教訓大家，千祈唔好盡信客戶服務嘅說話，有乜嘢唔妥一定要問清楚。