高鐵撥款爭議火藥味濃，前日未正式上正場，毓民同老詹預演爆粗大龍鳳，為669億元撥款大戰掀序幕，事後卻扮晒河蟹握手言和，好多人都覺得結局戲劇性過龍，真係反高潮。
噚日立法會仍然有唔少人談論爆粗鬧劇，唔只一個議員私下同八方講，越睇越覺得毓民同老詹唔係玩爆肚，事關老詹做議員多年，真係乜嘢大場面未見過，前日卻竟然起身拍枱，呢個動作不得不令人覺得佢係蓄意挑釁（或是係挑逗）毓民。
陰謀論一：夾埋玩公專聯
據在場嘅李卓人講，佢見到老詹有所動作，已即刻勸毓民，「唔好同佢嘈啦。」點知毓民火遮眼，後來更企起身同老詹互相指罵。點解老詹撩交嗌？毓民又一撻即着呢？有議員指，當時正討論是否容許公共專業聯盟出席財委會解釋新高鐵方案，老詹撐政府，自然費事聽公專聯講嘢，其實部份泛民對公專聯起勢抽水都不以為然，因此兩人一拍即合，你起圍我還拖，公專聯單嘢冇人理。
做人見好就收，所以兩人好快收聲，隨即拍晒膊頭做番friend，大團圓結局。呢啲政圈耳語，八方姑妄聽之，實情相信只有兩個男主角先至心知肚明，老詹同毓民加埋百幾歲，如果真係咁好戲，咪勁過柴九、威過張家輝？戲王之王雙影帝當之無愧。對於老詹忽然發難，政界有另一說法，指老詹做醜人，只係為人作嫁衣裳。
陰謀論二：為白姐姐造勢
泛民今個月底宣佈總辭，曾揚言會一齊總辭玩鋪勁嘅老詹似乎想縮沙，雖然佢唔跟，但其好友謝超人位紅顏知己白姐姐卻戰意甚濃，聲言要狙擊毓民，總之要決一高下，老詹唔去馬，但可以做白姐姐先頭部隊，先聲奪人過毓民一棟，壓一壓毓民銳氣，一為神功，二為弟子，點計都冇蝕。
老詹同毓民有積怨眾所周知，老詹對於社民連掟蕉、掃場舉動一直唔順超，甚至召集建制派「飯聯盟」抗衡，前日可能真係忍無可忍，邊個話40後、50後唔可以激進o架。
mailto:[email protected]