娛樂圈五光十色，每年吸引無數美少女湧入，編織她們的明星夢。但幾璀璨都好，娛樂圈是非圈，辛酸不足為外人道，像陸詩韻、沈卓盈，在圈中見識過，反而希望給自己多一些選擇，她們都有意轉戰場，為自己的人生創一番新天地。
沈卓盈及陸詩韻多年來都在娛圈打滾，近日兩人不約而同另覓發展機會，問到是不是怕o靚模威脅，陸詩韻說：「我唔係唔做呢行，只係有機會不妨試吓其他嘢，家幫Daddy手，學做生意，已經開始咗9個月喇！無綫都好體諒我，畀時間我去做其他嘢，自己都唔細嘞，想轉型，唔可以再行以前嘅路線，呢啲留番畀班o靚模做！學吓做生意，就算再接工作都唔會接泳衣之類嘅騷，唔想影響Daddy公司同自己做生意嘅形象。」
「其實都唔捨得」
轉型做女強人，莫非陸詩韻對娛樂圈心灰意冷？她說：「其實都會唔捨得，不過家主力學做生意，好多時會需要周圍飛，如果接劇集拍連度期都成問題；不過節目主持仍然可以接，最近蔡瀾個節目我都有份，去咗馬來西亞飲飲食食講享受，總之度到期我都想做，唔想觀眾以為我離開呢行。」
沈卓盈主持過兒童節目，拍了很多廣告，近年主力拍劇，早前在《古靈精探》入面大跳鋼管舞的演出，令人印象深刻。她說：「可能入行做咗5年兒童節目，令人誤會我有好多嘢唔做得，所以《古靈精探》入面跳鋼管舞，對我嚟講都係一個大突破，我拍之前都有去學咗幾堂，我想做到最好。」
想拍豐胸廣告
之前是無綫經理人合約，現在轉簽普通藝員合約，沈卓盈首要學會照顧自己，她說：「以前有經理人，家乜都要自己去傾去處理，不過相對又會比較自由，可以揀自己鍾意嘅工作。」沈卓盈曾經在無綫巡禮穿着性感晚裝大騷身材，她表示不介意接拍豐胸及內衣廣告，她說：「乜嘢類型嘅廣告都會考慮。」
採訪：楊潔雯 攝影：林德雄