利字當頭，深水埗電腦節鬧雙胞，由幾個「腦場」組成嘅香港電腦業協會，同主辦電腦節嘅香港電腦商會近日罵戰升級，互指不是，香港電腦商會噚日聯同區議會出嚟反擊，指腦場生意難做，係因為業主瘋狂加租，電腦節反而吸引更多市民去深水埗，帶挈咗腦場就真，而好多電腦舖頭都係自己業主開嘅，邊啲人得益，心知肚明啦。
商會主席梁定球又強調，商會所有會董冇人工，展期內出售嘅產品有售後服務，超過六成參展商都係電腦商戶，總之有錢大家搵，冇搵人着數云云。球哥對於被惡意中傷表現激動，聲言唔排除以法律行動保護「深水埗電腦節」名節。
做生意都係求財，唔係求氣，一般消費者都懶理呢啲鬼打鬼風波，最緊要有平貨掃，邊度多筍貨，咪去幫襯囉。