肥仔K自幼在地區學校就讀，憑電腦抽籤派位，與佢之家庭世交同輩幾乎個個讀香港名校、國際學校嘅情況完全唔同，佢間中學素重催谷，教學生點樣考試，每年例牌成隊兵咁操入大學。偏偏肥仔K最怕考試規範化，會考成績（最佳六科）得十七分，返唔到原校升中六（學校要最少廿三分），只得遠走他方，到外國讀書。佢班同學就操入中大、港大、科大、理大、城大，今天佢班經常往來嘅中學同學之中，有醫生（中大）、律師（港大）、建築師（港大）、政務官（浸大）、會計師（城大）、工程師（理大）、警察幫辦（科大），呢班當年一齊玩泥沙露營之o靚仔o靚女，又是所謂八十後，十年之間，搖身一變，成為專業人士，又真係幾醒噃，邊個話本地中學教育唔掂呀？
但係新科專業人士仲未可以發圍，即使醫生嫁律師，都要打電話親自向曾特首投訴，買唔起港島中半山住宅啦。律師、醫生、會計師搵工就唔使發愁住，但建築師、工程師就驚嘞。肥仔K嗰三位工程師、建築師同學畢業後五年已去過澳門、新加坡、杜拜工作，最近杜拜爆煲，大量工作停頓，佢哋返回香港，工程師就話可以等高鐵開工，希望搵到工，肥仔K笑佢哋：「喂，我哋都係八十後，上唔上街反高鐵呀？」工程師立即講：「反乜呀，不如反齊十大建設，等我哋乞米或者轉行跟施永青！」工程師就話有得等啫，建築師就煩啲，佢啱啱被一家大型建築師行裁員裁走咗，驚住真係要跟施永青做地產經紀，毀掉佢嘅兒時夢想，因為佢自識得砌Lego積木，就以做建築師為志願嘅嘞。
據地盤總監惡佬明講，建築師嘅權威性日漸下降，在建築公司內還算受人尊重，但建築師樓之則師係畀出錢嘅人（即發展商）點嘅，唔聽點就行開，唔好支支左左，直情冇晒尊嚴。醒起惡佬明係熱心選民，二○○四年就話投票畀長毛梁國雄，○八年又一樣，直情係長毛擁躉。但家長毛反高鐵喎，問惡佬明點睇五區總辭？惡佬明話：「如果長毛辭職，參加補選，我一定唔投佢一票，多數係棄權唔投票啦，唔通投票畀民建聯咩！」惡佬明話所有地盤佬都反反高鐵，希望工程盡快上馬開工，佢又話好多地盤佬都覺得長毛在立會內擲蕉好過癮，個個話爽，值得投佢一票，但講到反高鐵，飯碗攸關，想在補選支持長毛就難咯。