豬流感針打出禍，政府急召港大教授袁國勇等專家善後，八方噚日見到袁教授，眼前一亮，袁教授新年換新look；佢以前一直留一個保守、典型學者式髮型，變髮後竟然做咗長毛飛，過耳及肩嘅長髮，瀟灑之中帶有一點披頭四嘅不羈，發言時仲好似更加權威自信，八方聽聞唔少學者、醫生對袁教授呢個新形象好評如潮。
仍是灰色企領戰衣
雖然以新髮型亮相，不過袁教授卻唔捨得換戰衣，繼續着灰色企領外套見記者，十分長情。據講教授最少有四、五件一模一樣嘅外套，咦，咁教授個衣櫃咪好似蝙蝠俠或者麥當勞叔叔個衣櫃！
衞生防護中心總監曾浩輝噚日坐喺袁教授旁邊，十年如一日嘅髮型頓然失色，望真啲，曾醫生頭髮好似同舊年有啲唔同，佢工作繁重，要長年keep住同一個髮型又確係幾唔容易，如果有興趣換個新look，快啲請教吓袁教授啦。