賭王三姨太陳婉珍捐200萬為長者護理中心命名，紀念亡母鄒蓮。超蓮近期與6呎2吋高的靚仔男友Jeremy拍拖，超蓮自爆男友花名肥豪，又踢爆胞弟猷啟也譜姊弟戀。三姨太則表明仔女拖友一概視為朋友，更指自己眼中只有賭王最靚仔。
賭王三姨太陳婉珍愛母情深，08年母親鄒蓮去世，三姨太在家以淚洗面。她昨日在沙田出席護理中心開幕，捐出200萬以母親名字命名東華三院鄒蓮女士長者日間護理中心，囡囡超蓮都有出席，長女超雲則代母親去醫院探賭王。
捐出亡母遺產
三姨太指200萬是亡母的遺產，她說：「係用媽咪剩低嘅錢，我媽咪不嬲好唔鍾意人哋住老人院，一見到人哋住老人院，佢就會喊。家啲後生仔要返工返學，日間老人家有地方去，等佢哋放工咪接返去一家人，對兩者都好。」之前有老人院女護理主任虐老吃屎，她說：「唔敢批評人哋，但東華嘅護老係好有保證。」
超蓮則透露外婆非常疼錫她們，她說：「媽咪一鬧我，或者唔畀我睇電視，我就搵婆婆做擋箭牌，佢有買糖畀我食，我又有帶佢去海洋公園玩。」
超蓮和男友Jeremy拍拖，問到三姨太可滿意？三姨太對Jeremy名字一頭霧水，超蓮惟有硬住頭皮說：「即係肥豪呀。」三姨太表示見過超蓮男友肥豪，她說：「都係識朋友啫，呢啲豆芽夢。」超蓮又踢爆細佬猷啟跟比他年長的21歲女友拍拖，不過母親嚴令要讀書為先。
超蓮揮春贈父
此外，大會昨日送了一幅手繪的三姨太肖像作禮物，三姨太和超蓮又和長者一齊玩遊戲、製作小花及寫揮春，超蓮更揀了一張寫上精神爽利的揮春，她說：「拎返去送畀爹哋。」
採訪、攝影：LawWaiMan