港股由21000的低位回升，到昨日升到22548點，累升超過1500點，中間只有三兩日微幅回軟，到昨日始出現較大幅調整，恒指曾下跌240多點，收市22269，跌147點，估計調整再多一兩日，下禮拜升勢會再現。
大戶收集似完成
基金同大戶始終都在買貨，但用輪流玩策略，今日買呢批，聽日買嗰批，升得急嘅就㩒番低多少，到下一輪，又再買過。大戶一郁手，就算係大價股，閒閒哋都會升10個8個巴仙，好似呢輪俾中央㩒到實嘅內房股，冇人估得到仲會有運行，但大戶一落手，一樣可以掃到飛起，好多內房股噚日都逆市而升，越秀地產（123）最突出，高收2.29元，大升0.14元，升幅6.5%；中渝置地（1224）亦一度搶上3.85元，升0.23元，回收3.69元，仍升7仙。
深圳國際（152）係大落後股，但噚日竟然有異動，高收0.64元，升3仙，升幅4.9%，成交更加墟冚，有成3.91億股，比前日大增5.4倍，相信大戶收集已完成，呢類慢熱股一發力，升幅可以好勁。
由去年8月開始，深國成個大圓底形態，而「右柄」整固足足大半年，昨日股價抽升，已擺脫3條平均線，而MACD亦出現「雙牛」入貨訊號，一升破0.65元阻力，大升浪即可確認，短期上升目標指向1元水平，預期升幅56%。去年5月，深國在短短一個月內，股價就由0.40元衝上0.60元，大升50%；而在7到8月，由0.50元升到0.70，升40%。
深國主要業務係經營高速公路同物流園，單係持有深高速A股及H股（548），以及南玻集團兩家公司嘅股權，以噚日收市價計，合共市值已達95.6億元，已遠超出深國市值90.6億元。另外，深國本身仲有兩條高速公路，同6個物流園及碼頭，佔地超過110萬平方米，資產又係以10億元計。
09年（12月年結），估計深國盈利11億元，每股盈利7.8仙，以紅籌股15倍PE計，股價可見1.17元。
郭兆誠