高鐵撥款決戰今天，80後反高鐵人士號召大家Big爆立法會，希望創造傳奇一刻嗌停高鐵，支持高鐵盡快上馬嘅人，都總動員晒馬為政府護航，專業學會、商會掟錢賣廣告挺高鐵，自由黨拉雜成軍都call到幾十人遊行，有個「80後」卻撐高鐵——82歲嘅李超人話應該興建高鐵。
超人噚日出席一個酒會後，被問到高鐵撥款好多爭拗嘅問題，佢話相信香港人有智慧傾掂呢件嘢，又話任何對香港長遠利益有好處嘅事，佢都支持。若高鐵如期上馬，預計2015年通車，屆時超人孫仔長治6歲左右，可以同爺爺搭高鐵遊車河，不過媽媽梁洛施有冇份坐就未知嘞，事關噚日記者問超人係咪娶新抱，佢即刻面黑呀。
運輸局想快刀斬亂麻
泛民今日勢打拉布戰，八方聽聞運輸局怕夜長夢多，漏夜磨利「金鉸剪」，今日隨時出招將長過紮腳布嘅馬拉松式會議剪斷，局方已指示專人研究立法會《議事規則》，睇吓可唔可以由建制派議員提出一個「要求通過高鐵撥款」動議，封殺泛民無止境提問同其他程序動議，直接進入表決程序。
咁樣快刀斬亂麻是否可行，據了解運輸局未有十足把握，但理論上可行，不過八方問過熟悉《議事規則》人士，則指呢招唔高明，甚至可能「金鉸剪」自插大髀搵自己笨，事關其他泛民議員可以就呢個動議提出層出不窮修訂，結果都係沒完沒了。
邱副局又甩底唔辯論
運輸局高官近日忙於幕後箍票，副局長邱誠武原本答應上電視同反高鐵分子朱凱迪公開辯論高鐵問題，後來又反口，據講邱副局係第二度甩底，佢收咁高人工，可能覺得親自落區先好過上電視做騷啦。今日良知Big爆中環可以預期，本地Twitter活躍推友有共識，以#stopxrl標籤發放高鐵資訊，為咗令今日唔得閒去中環嘅人都知道集會實況，推友會現場即時圖文直播，大家可以留意。
mailto:[email protected]